AGB & Datenschutz | Impressum | Över us
 

30 Jahre BNA Jubiläumsausgabe

Plattdütsch Blaumen XIV

Riemels un Vertellers ut Meckelborg-Vörpommern un de Uckermark

Bund Niederdeutscher Autoren e.V. (Rg.)

As se sülven seggt, mit Geschichten un Gedichten von ole Schrieverslüüd, de al lang nich mehr leevt un ok vun junge Lüüd, de nu mit in den Autorenkring sünd. Vele vun de Autoren sünd ok över ehr Land hen bekannt, t.B. Lilo Arendt, Erna Taege-Rönisch,Jürgen Pump, Malte Dau, Hans Wilken, Wolfgang Mahnke, Horst Gädert, Jürgen Rogge, Dietrich Sabban, Karl-Heinz Maddaus, üm blots en poor to nennen.

Un so ünnerschedlich as de Schrieverslüüd, sünd ok de Geschichten.

Dat geiht üm politische Texten, Beschrieven vun Land un Lüdd, Erinnern an fröher Tieden in de damalige DDR, bet hen to Anekdoten, Sagen, Märken, Satire oder lustige persönliche Belevnisse.

En poor Geschichten, de mi besünners gefullen hebbt, will ik hier kort anrieten.

Dat sünd t.B. „De Damperfohrt“ vun Egon Vohs, „Hei süht ut as so’n Swien“ vun Heinz Groth, „Ik bün för’t Gräunfauder taustännig“ vun Anne Hiering, „Egon sien Rezept“ vun Heidelinde Wulff oder „Brot un Spiele“ vun Wolfgang Mahnke.

De „Vertellers“, as de Geschichten in Meckelborg-Vörpommern nöömt warrn, hebbt keen Anspruch op grote Literatur, man se sünd goot schreven un männichmal ok heel witzig. Is kloor, dat bi so veel Texten ok af un an een dorbi is, de man so bi anner Schrieverslüüd al leest hett.

Dat Book het 202 Sieden un achteran noch twee Sieden mit de Naams vun de Autoren. Sünd bannig veel dorbi, de al en Krüüz achter ehr Naams hebbt.

En Book „Tau’n Hoegen un Besinn’n. Stäken S‘ de Näs eins rin. Ick wünsch Sei väl Spaß un Freud bi’t Läsen!“, as Wolfgang Mahnke in sien Vörwort schrifft.

Dor kann ik mi blots ansluten!

Johanna Kastendieck (Rezension, rutkamen in: Quickborn 2020)

De Ehrenvörsitter vun den "Bund Niederdeutscher Autoren e. V." Wolfgang Mahnke schrifft:

Leiw Läser, tau dat Jubiläum, „30 Johr Bund Niederdeutscher Autoren e. V.“ för Mäkelborg-Vörpommern un dei Uckermark (BNA), hett sick dei Vörstand von’n BNA wat besonners utklamüstert: All Schriewerslüd, dei as Vereinsmitglieder för dei BNA-Anthologie, „Plattdütsch Blaumen, Bäuker I (1991) bet XIII (2018), Riemels orer Vertellers schräwen hebben, sall’n in’t Jubiläumsbauk noch eins tau Wurt kamen.

Üm von dei Idee tau ein druckriep Ergäwnis tau kamen, hebben vier „Olle BNA-Haasen“, Edeltraud Richter (Trittelwitz), Heidelinde Wulff (Rostock), Dieter Lockenvitz (Berlin) un Wolfgang Mahnke (Rostock), maandelang dei drüddteigen Bäuker (2.100 Sieden)nipp dörchkäken, un nah väl Afwägerie von fiefunsoebentig Frugens- un Mannslüd* Riemels unVertellers rutsöcht, dei „charakteristisch“ för denn’ Autor un sien Schriewort sünd. Dei bunte Struz „Plattdütsch Blaumen“, Jubiläumsbauk XIV, dei nu für Sei liggt, is dorbi rutkamen.

Vereinsvörsitter sünd dei Kapteins. Oewer ahn plietsche Stüerlüd up dei Brügg un flietig Maaten an Deck könn’n sei ehr Schipp nich unner Damp holl’n un ok nich säker dörch dei Krisenklippen stüern! Ick müsst hier nu dei Namen von väle Vereinsmitglieder uptell’n, dei in dei dörtig Johr BNA grotorrige Arbeid makt hebben. Nähm S’ mi dat nich oewel, wenn’k blot twei dorvon an disse Stell nöm: Edeltraud Richter, siet 2018 Ehrenmitglied in’n Schriewerbund, dei länger as kein anner BNA-Schatzmeister wier un Dieter Lockenvitz, dei tweimal Johr för Johr uns’ BNA-Vereinsnahrichten, dei „Apporten“, rutgäwen hett.

Dei 30 Johr Bund Niederdeutscher Autoren sünd ein Erfolgsgeschicht, wieldat starke, kreative Schriewerslüd dat BNA-Stüerrad ümmer fast in’e Hand harrn un mit ehr niemodsche Literatur dorför sorgt hebben, dat Plattdütsch in uns’ Land ok taukünftig ein wichtig Kulturgaut bliwt!

14,8 x 21 cm

Broschur

ISBN 978-3-86863-206-4

Milow: Schibri Verlag 2020, 204 S.

Kategorie: Böker
Bestellnummer: BO SBR 4283
Pries: 11,00 EUR  + Versand
Wo veel wullt du?
   Stück
torüch na de letzte Siet torüch na de letzte Siet