Us "CD des Jahres" 2009 - dat hele Leven op een Spegelplaten! Gitta Franken un ehr Dreeblatt speelt op de brede Klaviatur vun't Föhlen, Dinken un Wesen: Vun plinköögschen Humor ("Froo Müller") över vergnööglich Dummtüüch ("Mien Blues") bet na tietkritisch anklagen Leder ("Waar sünd se hen?"). Jüst so de Rhythmen to de Leder, altohopen schreven vun Gitta un ehren Kirl Udo: Mal suust se di vergöögt üm de Ohren, annermal hebbt se all de irnsthaftige Melancholie, de to'n Bispill ok in Hermannn van Veen sien Leder liggt, mal överrascht en Rhythmuswessel un schufft di anner Biller dör'n Gehörgang in'n Bregen. De Texten sünd di veel plietscher as bi Godewind & Co., liekers geiht dat jüst so goot in't Ohr: De Gesangstimm blifft in'n Vöörgrund, ünnerstütt vun een tweete Stimm (Ute de Haan) - mitünner ok mit korte a-capella-Törns middenmang. Schall mi verlangen, wat di nich ok de een oder anner Melodie as Ohrworm nageiht un bavento dat Danztee-Danzbeen an to jöken fangt. Blangenbi geseggt: Anners as de masse anner Platt-Musikers künnt de Frankens ok richtig Platt - bruukst nich bang ween, datt du över enkelte Städen över weghören muttst. De Titels: 1. ik bün en lüttjen Vögel 2. Ik weet Bescheed 3. Eenst sach ik daar 4. Froo Müller 5. Tied för mi 6. Maakst du't recht 7. Mien Dröm 8. De Fernsehkrimi 9. De eerste Steern 10. Wees man blied 11. Dat is Glück 12. Waar sünd se hen? 13. Johanns Bruud 14. Mien Blues 15. Oll Fründ 16. En Dröm för di
Gitta Franken, geb. Mennenga, is 1959 in Hage born. Opwussen is se in Leezdörp un in Grootheid. Arbeid hett se as Erzieherin un as Kinnergoornbaas. Vandaag leevt se in Südbrookmerland. Se maakt masse för Kinner, aver ok för Grote, op Platt un Hoch: Musik, Geschichten un Theaterstücken.
Udo Franken, 1951 in Emmen (Emden) born, was Sonnerschoolmester. He wahnt mit Gitta tohoop un schrifft un oversett plattdüütsche Theaterstücke, Hörspele un Böker för Grote un för Kinner.
Ute de Haan begleit de beiden Frankens mit Achtergrundgesang un Percussion.
In dat Booklet sün all Texten in to finnen. Gitta un Udo Franken 2009, 59 Min. Speeltiet.
