Grimm, Bröder / Bullerdiek, Bolko
Grimms Märchen op Platt

Laat di vertellen ut ole Tieden, as dat Wünschen noch hulpen hett: Bolko Bullerdiek hett söss Märkens in't Plattdüütsche bröcht: Rotkäppchen, Dornröschen, den Poggenkönig un anners welcke. Dormit nich tofreden, greep he sülms noch to de Fedder un schreev söss wunnerschöne egene Interpretatschonen, Ümdichtungen ut us Tiet, so as „De Wohrheit över Dornrösken“, „Goldmarie ehr Antwoort“ oder „Woans de Poggenkönig ut sien düüster Lock rutkeem“.

Bolko Bullerdiek seggt sülms to dat neje Lusterbook:

Märken, meent wi, sünd Geschichten för Kinner. De köönt sick doröver verwunnern, dat de Pogg sick ton Prinzen verwannelt, dat Dornrösken no hunnert Johr von den Prinzen waakküsst ward un de Jäger Rotkäppchen un ehr Grootmudder wedder ut den Buuk von den Wulf ruthaalt.
Liekers, de Märken weern fröher nich Literatur för Kinner. Fröher - as dat keen Fernsehen geev, keen Rundfunk, keen Zeitung – do weer dat winterdaags op’n Dörpen langwielig. Un denn sünd af un an Märkenverteller vörbikamen un hebbt stunnenlang Märken vertellt. Un all hebbt se tolustert: de Jungen un de Olen, de Kloken un de Dummen – all hebbt se de Märken so verstahn, as dat för jem möglich weer. De Verstännigen hebbt dor mehr von verstahn as de annern. Dat lett sick denken.
Jakob un Wilhelm Grimm hebbt de mehrsten Märken hochdüütsch höört, ofschoonst, natürlich, in Norddüütschland Märken fröher op Platt vertellt worrn sünd. Dorüm heff ick mit Frünnen de Märken in’t Plattdüütsche översett.
Un jümmer, wenn ick se lees, överlegg ick: Wat seggt se mi? Woveel verstah ick dorvon? Achter elkeen Märken, wat ick hier lees, kummt jümmer wat achteran: Nich en scharpsinnige Interpretation – dorbi geiht licht de Spaaß perdü - , man en Vertellen, dat düütlich maakt, woans man dit Märken verstahn kann - nich mutt. Un dat is wichtig: Dat gifft mehr Orten, Märken to verstahn. Un elkeen schull dorbi sienen egen Kopp bruken. Dorför hett he em.

Also, ick wünsch veel Vergnögen.

Ehr Bolko Bullerdiek

Een Biheft gifft dat mit to.
Hamborg: Hörbuch Dahms Verlag 2007, 80 Min. Speeltiet
ISBN 978-3-940229-04-5

ISBN: 9783940229045
Kategorie: CDs

Bestellnummer: CD DAH 1256
Grimms Märchen op Platt
Dat köst Woveel wullt Du?
€ 12,00
+ Versand
Een Sied trüch