Reichstein, Gesine / Fischer, Peter (Ill.)
Dag för Dag mit de Taxe föhren

Wat dat de stolte Opa Siemering is, de in’t stolte Öller vun sounsoveel Johren mit sien nableven twintig egen Tähn na’n Tähndokter mutt, oder de „Mien-leeve-Froo“, de jüst ut de Mannslüüd ehr Welt – den Boomarkt loskummt un ehr Frustratschoon över dat starke Geslecht loswarrn mutt: De Taxi-Vertellens vun Gesine Reichstein lohnt dat Lesen. Kortwielig, lebennig un ut use Tiet. Schoonst de Geschichten kort sünd, kaamt di de Typen, de de Schrieversche vörstellt, heel düütlich vör Ogen to stahn, mit all ehr Macken un Besünnerheiten – wat dat nu de Stolt op de egen Tähn, de Knoblochaten oder Peerappeln in’t Gepäck sünd. Un wat so’n Taxiföhrer allens utholen mutt, kannst di denn eerst vörstellen, wenn du düt Book leest hest: Ik snack in mien Leven keen Taxiföhrer mehr an, düsse Lüüd dröhnt sowieso de Ohren, vun all dat, wat se sik Dag för Dag an Levensbichten, Klagen un Queseree anhören mööt, ohn dat se - der Kunde ist König - jem mal ehr Menen seggen kunnen.
Mitünner muttst’n beten mitdinken bi’t Lesen - wenn de Fohrgast mit Wiehnachten sien Osterkrüüz to dregen hett oder bi’n Football allens mal wedder hochsteriliseert ward - gifft af un an ok mal echt wat to’n In-Sik-Ringrienen. De Wessel twüschen de Föhrersche ehr Gedankenwelt op de een Siet un ehr Snacken mit de Kunnen op de anner Siet -kinnst du ok, datt du wat anners dinkst, as du seggst - gifft dat Book de Grundspannung, de sik bet toletzt holen deit.
Un all dat mit en rieken Utdruck op Platt. Ehr Bentheimer Platt lett Gesine Reichstein sik ok as Bremerin nich nehmen, man dat is allerwegens goot to verstahn. Dat Bremer Lokaalkolorit maakt düt Book sien Farven jedenfalls noch scharper ...

Gesine Reichstein arbeit as Redakteursche bi Radio Bremen. Upwussen is se in de Grafschupp Benthem un leevt siet vele Johren in Bremen. Se is mit Plattdüütsch groot worrn, hett düsse Spraak studeert un gifft sick darmit af in ehr Professchoon un blangenbi. Se hett ok Lexen schreven, wo een Plattdüütsch mit lehren kann. (Verlagsinformatschoon)

Mit Glossar. Fast inbunnen.

Bremen: Edition Temmen 2007, 94 S.

ISBN 978-3-86108-569-0

ISBN:
Kategorie: Böker

Bestellnummer: BO TEM 1282
Dag för Dag mit de Taxe föhren
Dat köst Woveel wullt Du?
€ 12,90
+ Versand
Een Sied trüch