Spraken lehren, dat lohnt sik. Seggt Opa. Un worüm nich Navershond Bruno sien Honnenspraak? Tjark, de lütte Held vun düt Book, maakt sik dat to Opgaav. Un wat he de Müüs nich ok noch dat Lesen lehren kann? Oder mit Opa üm de Wett bölken, bet Naversbuur Uli sien Schaap bang warrt un de Fisch ut'n Diek to störken kummt un trüchbölkt. Vun inbilldte Katten, bangbüxige Naverskinner un utverschaamte Navershonnen is hier to lesen. Een Mehrgeneratschonenbook, to'n Vörlesen för Opas, Öllern, Kinner un Grootkinner. Du duukst in in dat Leven op en olen Hoff vull Leven, wo dat nich blots snaaksche Saken to entdecken gifft, sünnern ok dat gesunne Landleven vun vundaag - mit Biokräckers un Ökohonnig un liekers veel Platz to'n Spelen, Toven un Entdecken. Dor mang vergnöögliche Riemels, de dien Kinner oer Grootkinner mit di tosamen grienen laat. En lütt Kunstwark is düt Book, dorbi so flexibel as man wat: All Geschichten sünd blangen de plattdüütschen ok op Hochdüütsch to finnen. Un denn ok noch op de Spegelschiev, dorto wunnerschöne Kinnerleder, schreven vun Rika Tjakea Schütte - vun Johannn Peter Voss sien stolten Bullen oder vun de sliemig-rutschigen Snicken, de op ehren bedächtigen Weg na Navers Koppsalat henflutscht. Alleen för düsse Kinnerleder wör sik dat Book lohnen! En richtiget Kinnerbook, nich wiet af vun Astrid Lindgren ehr Helden un Franz Fühmann sien Spraakspele. De bunten, kinnergerechten Illustratschonen vun Christine Krüger geevt düt Book vun buten de glieke bunte Farv, de dor ok binnen stickt. Hayo Schütte, Johrgang 1930, is en penschoneerten Spraken-Schoolmester, de al langen in't hannöversche Wendland leevt. Broschur, mit CD, Noten, Akkorden un Illustratschonen. ISBN 978-3-00-025936-4 Langendörp/Elv: Hayo Schütte sien Sübstverlag 2008, 100 S., CD mit 79 Min. Speeltiet
