Jacobsen, Jochen
Eenen in'n Sinn
Niege achtersinnige Leder

Leder mit Achtersinn un mitünner Plinkögen - mit Texten vun Gerd Lüpke, Klaus Groth, Heinrich Andresen un Carl Michael Bellmann - un vun Jacobsen sübst. De Stil hett wat vun Pop, Folk un Jazz - un vun en däägten plattdüütschen Ledermaker - laat di överraschen!

Mit Booklet, wo en poor vun de Texten in afdruckt sünd - de annern finnst op den Ledermaker sien Homepage.

Büdelsdörp: Dat Label 2009,67 Min. Speeltiet.

Marianne Ehlers schrifft dorto:
Op „The Entertainers“ kann ik mi jüst noch besinnen – mit düsse Band is Jochen Jacobsen fröher in’n Noorden överall ünnerwegens ween. Dat he en „Entertainer“ bleven is, wiest he uns mit düsse CD, de jüst op den Markt kamen is. Jochen Jacobsen ut Kiel hett op düsse CD niege achtersinnige Leder vörleggt – un de niegen Töön sünd ok dat, wat den Hörer goot gefallt. Keen Texten, de blots vun Heimat un See hanneln doot – dat Spektrum is veel breder un geiht över Minsch un Leven, över Fragen vun vundaag bit hen na Översettens vun Carl-Michael Bellmann un Wilhelm Busch. Ok en Leed vun George Moustaki is dorbi: „Dat Feld“ vertellt vun den Utlanner in Düütschland, de sein Geld op Eerdbeer- un Spargelfeller verdeent, jümmerto mit dat Lengen dorbi. En wunnerschöön Leed, dat mi in düsse plattdüütsch Verschoon meist nich ut den Kopp geiht. He speelt mit de verscheden musikaalschen Richten – dat is em op ’t Best glückt. „Ol Büsum“ vun Klaus Groth warrt en plattdüütschen HipHop – un en Techno-Stück „Keen Tiet“ is ok dorbi, de „Klookschieter-Reggae“ snackt för sik. Mitünner heff ik meent, Alfred Hause sien Danzorchester speelt in’n Achtergrund, soveel gifft dat Keyboard her.
Jochen Jacobsen is in de Musik vun Jazz, Folk un Rock tohuus – dat knütt he tohoop mit Texten, de den Minschen vundaag angaht, „Dat ole Poor“, dat sik an fröher besinnt un villicht doch allens en beten schöner denkt as dat richtig weer – „De Rentnerbank“ mit all de Snackerie vun Geld un de Welt – „To’n Fröhstück“, wenn een sik freut, dat een
sülven bi de Doods-Annoncen noch nich dorbi is. Heimat begrippt he nich sentimental, se speelt en Rull för den Minschen, man he süht ehr ok ut de satiersche Eck an. Heinrich Andresen sien „Poggenwelt“ hett Jacobsen mit Swung un Witz vertoont – dat kunn ok Kinner gefallen. Of
sünst junge Lüüd sik anspraken föhlt, wat de Texten angeiht, liekers dor HipHop un Techno-Elementen bi sünd, weet ik nich so recht. Ik denk mehr an de Öllersgrupp Föfftig plus – dat sünd de Denk- un Föhlstrukturen vun Jochen Jacobsen sien Leder. In dat „booklet“ staht en poor Texten afdruckt, lang nich all. Dat finn ik en beten schaad, ik harr geern allens naleest, man dat hett seker nich ganz passt. Liekers kann ik Jochen Jacobsen graleren: Dat is en richtig schöne CD worrn. (Blätter der Fehrs-Gilde)


ISBN:
Kategorie: CDs

Bestellnummer: CD JAC 1637
Eenen in'n Sinn
Dat köst Woveel wullt Du?
€ 14,95
+ Versand
Een Sied trüch