Hart weer dat Leven för de Sulteknechten op de Lümbörger Sülte (Saline): Jeden Dag müssen se arbeiden, 13 Stünnen in de Dagschicht, 11 de Nacht. Un free geev dat blots een Dag in't Johr - op'n Stillen Freedag. Ekhard Ninnemann hett de Sulteknechten un all de annern Arbeitslüüd op de Sülte en Dinkmaal sett mit sien "soltige Poesie". De suren, man ok de wenigen söten Sieden vun't Leven wert ut ünnerscheedlichste Perspektiven vertellt: Blangen de Knechten kaamt ok Kinner to Woort. De damalige Technik, de Gerüche, de Gesänge vun de Arbeiters, mn ok dat Stadtbild ut Middelöller un ut dat 16. Johrhunnert staht di mit de Prosagedichten vör Ogen. All Gedichten sünd ok blangenan in lüttere Schrift op Hochdüütsch natolesen. Ekhard Ninnemann hett sik inarbeit in de Terminologie un in de Geschicht vun de Sülte un ehr Minschen. Blangen de Gedichten wert Achtergrünnen ut Wirtschaft, Arbeitsrecht, man ok ole Wöör verklort, jümmers ahn datt sik dat opdrängt. De Grafik vun Volker Butenschön, de op historische Motive trüchgrippt, un de solide Inband maakt ut düt Book en smucke un liekers däägte Brügg twüschen dat Lümborg vun hüüt un güstern. ISBN 978-3-9236- 0308-4 Lüneburg: Stern-Verlag 2013, 50 S.
