Bullerdiek, Bolko
Fundsoken
Geschichten von güstern un vondoog

Funnen hett Bolko Bullerdiek in sien Leven so allerhand: Geschichten ut sien Kinnertiet, to'n Deel bannig persönlich, de Perspektive mitünner en buten wunnerlich, as weren se vun en Frömden vertellt, as wenn sik een dor op Afstand to sik sülms güng. Man de Blick na achtern fallt scharp ut: Woans sien Grootöllern sik kinnenlehrt hebbt, de kuum ünnerscheedlicher ween künnt harn, un woans dat Leven in jem ehr Abstinenzler-Gaststääd togüng. Du markst, dat weren Minschen, de den Verteller veel bedüden deen. Man denn ok de egen Beleevnissen as Kind, dor mang ok een "de ik nienich vörlesen dee" (Bullerdiek in Lümborg, 15.5.2014)
Wunnerbor ok de Märken, vertellt ut de ünnerscheedlichsten Perspektiven. Du beleevst Rotkäppchen ut de Sicht vun den Wulf oder dat Märken vun den Wulf un de söven Zegenlämmer as en Ort Glieknis, wat in'n Orient speelt.
Ünner de Rubrik "Disteln un Blomen" finnst du achtersinnige Vertellens vun een, de sik vör klook höllt, aver jümmer wedder vun de annern mit de Nees dor op stött ward, datt de Blick mitünner nich över den Töllerrand langt, schoonst he de Kopp hoch bören deit.
As Zucker op Titt kannst - in en anner Rubrik - de Fabeln geneten, so as disse:

Doon is en Ding

En Höhnerküken stünn foken an't Woter, wenn de Oonten swömmen, stünn dor un keek un gruvel: Worüm künnt de Oonten swömmen un worüm kann ik 't nich?
- Du musst, säen de Oonten, eenfach in't Woter jumpen. Wokeen wat woogt, de winnt. Dat sühst du doch an uns.
Dat stimm. Dat sehg een an de Oonten un liekers ...
Dat Küken töger.
- Los!, säen de Oonten, Doon is 'n Ding!
- Goot, sä dat Küken, op jo Verantwoorden.
- Jo, säen de Oonten, dat nehmt wi op uns Kapp.
So jump dat Höhnerküken in't Water un soop af.
- Oh, schüddkoppen de Oonten, wo kann't blots angahn?!
MORAL: Doon is en Ding - un Vörsicht de Mudder vun de Porzellankist.
Oder: Wat anner Lüüd utboden mööt, kann'n goot op de egen Kapp nehmen.

En Book, wat dat in sik hett.


ISBN 978-3-87651-385-0

Hamburg: Quickborn-Verlag 2014, 152 S.

ISBN: 9783876513850
Kategorie: Böker

Bestellnummer: BO QUB 2781
Fundsoken
Dat köst Woveel wullt Du?
€ 10,80
+ Versand
Een Sied trüch