Dat Book vun den tweten Sieger bi "Vertell doch mal 2020" - Geschichten, de an't Hart gaht: In "De Natur - mien Goorn" vertellt Hartmut Großmann op en ganz egen Ort, woans he de Natur in'n Johresloop beleven deit. "Wat hett düsse Kerl för Ogen un Sinnen", heff ik mi dacht - un mi in'n Stillen bedankt, datt he för mi de Ogen apenmaakt un sien Indrück to Papeer bröcht hett. Dorbi blifft Großmann nich an'n Goorntuun stahn, nee, he nimmt Ackerland un Goorn, Flüsse un Beken, Hecken, Heid un Moor in'n Blick. Balsam för de Seel! Denn gifft dat twee Nikolausgeschichten un dat Leed "St. Niklas war ein Seemann" op Platt dorbi. Wüsst du al, datt Nikolaus en wohren Held weer un lichte Deerns vun de Straat wegrett hett? Züh, Hartmut verklort di dat in fiktive Dialoge twüschen Oma bzw. Opa un jemehr Grootkind. En Geschicht, wo di dat Hart in de Büx rutschen mag, is "En Hart in Not". Dat speelt op Haiti, jüst to de Tiet vun dat Erdbeben 2010. Saydou, en groten Suupkopp un slechten Vader, kummt ünner en Barg Schutt to liggen, in dat Düüster, bet em dat Geföhl för Ruum un Tiet afhannen kummt. As he markt, datt dat op't Enn togeiht, dor besinnt he sik un leggt en Verspreken af ... Utdachte Geschichten un wohre, so as de mit Ina Müller - dat Schönste an düt Book is villicht de Ünnerscheedlichkeit vun de Texten - du warst jümmer wedder mit en nee'en Inblick oder en anner Sichtwies överrascht. De Autor sülms seggt to düt Book: In düt Book finnt een ganz ünnerscheedliche Geschichten för grote un lütte Lüüd. Ut mien egen Beleven, wat to'n Högen, wat to'n Sinneren un en poor Gedanken över uns moderne Welt (inpackt in Satire). (Text op www.lueneplatt.de) Hartmut Großmann stammt ut Schlesien un wahnt vundaag in'n Kreis Horborg. In Stell gifft he an de dore Grundschool Plattdüütschünnerricht. Mit Woortverkloren. Berlin: epubli GmbH 2013, 166 S.
