Hecker, Emil / Volkshochschule Brunsbüttel e.V. (Rg.)
Douaumont
Plattdeutsche Gedichte über die Sinnlosigkeit des Krieges

Plattdüütsch "Book vun dat Johr 2014" / Plattdeutsches Buch des Jahres 2014:
Hecker sien Beleevnissen ut den Eersten Weltkrieg hebbt em sien Leven lang verfolgt. De 20 Gedichten, de he dor över schreven hett, kaamt nu eerst rut, hunnert Johr na den Kriegsanfang. Vörher hett Hecker jem blots aftrocken an gode Frünnen verdeelt.
Düsse Utgaav is en Faksimile vun de "Schrievmaschinenutgaav", blangen de plattdüütschen Gedichten hochdüütsche Pangdangs dorto. De Gedichten vertellt vun de Front, vun dat Gräsen, vun den Doot, vun de "Doden Dörper" an de Westfront üm Douaumont, de 1916 vun de Landkort verswunnen sünd, ümgraavt vun dusendfachen Artilleriebeschuss. Man Hecker kickt wieder, över den Tweten Weltkrieg, över Vietnam över rut. He is sik nich to schaad: He wohrschaut. Un he nimmt mitünner den damaligen Fiend sienen Blick in, stellt blangenanner de düütschen un de franzööschen Suldaten ehren Gloven, ehr Gebeten för den Sieg un gegen den Fiend. He stellt de Minschen ehr sinnlos Doon in hellet Licht. Un de Wunsch na Vergeven ward luud in sien Gedichten, wenn de Suldaten ehr Plicht erfüllt hebbt, den Fiend dootschaten hebbt un doch weet, datt dat, wat se doot, wat se doon mööt, Unrecht is un den Gegenöver bitt, dat Unrecht to vergeven.

Op de CD hett de Autor all sien hier versammelte Gedichten sülms inleest.

As Bispill för een vun de Gedichten, de den gruliche Alldag an de Front weddergifft, hier dat Gedicht Nr. 14:

Vörste Linie,
Mittwinternacht:
"Gottes Sohn,
o, wie lacht ..!"
Jungens vun achteihn,
man even ut Schol,
anlehrt to'n Morden
mit Flint un Pistol,
Handgronot,Spoden,
Gas, Bajonett,
hoolt se den vörsten Groven besett:
Trichter an Trichter,
Ies, Woter, Morast,
blauklomte Hannen
hoolt Mordwarkstüüch fast.
Lüchtkugeln fluckert
hell dör de Nacht
Licht fallt vun'n Heven
sachten .. heel sacht!
Lengen löppt langen
Weg dör de Tiet,
Lengen noh Moder ..
och, dat liggt wiet:
Füer in'n Oven ..
Klocken, de klingt ..
Lichten an'n Dannboom,
Kinner, de singt:
"Durch der Engel Halleluhjah
tönt es laut von fern und nah .."

Alarm! .. Alarm!
De Franzmann grippt an!"
Jedeen mutt morden,
so got, as he kann!


Paperback

ISBN 978-3-87651-388-1

Hamborg: Quickborn Verlag 2014, 47 S. + CD

ISBN: 9783876513881
Kategorie: Böker

Bestellnummer: BO QUB 2867
Douaumont
Dat köst Woveel wullt Du?
€ 8,80
+ Versand
Een Sied trüch