Dat is koolt un düüster. Lütt Kattker bevert, so bang is he. Wat is blots passeert? Woso is he nich tohuus in sien Nest? Wo sünd sien Bröder un Süstern, un wo is sien Moder? Wo is de Boom, in den he opwussen is un kladdern lehrt hett? Lütt Katteker hett Hunger un Döst. He weet: In't Düüstern kann dat böös gefährlich ween. He krüppt in en Busch rin un blifft still liggen, bet ... "Lütt Katteker" is de Geschicht vun en Kind, wat Vader un Moder un all sien Süstern un Bröder verlaren hett. Alleen mutt he sik nu dörslaan: Bi de Amsel verdeent he sik en por Wörm dormit, datt he ehr Eier warmt, wieldes se op Tour geiht un wat to freten för ehr Gören söcht. Man as de Botterlicker kummt, dor höllt he dat nich mehr ut un fangt an, achter em hertojachtern, un - bums - dor mallöört dat un twee vun de Amsel ehr Eier fallt an de Eer un sünd twei. Nichmal lütt Katteker wunnert sik, datt de Amsel em batz rutsmieten deit. Wedder steiht he alleen dor ... Toletzt glückt dat doch un he finnt een, wo he blieven kann. Nee, sien Öllern finnt he nich. Düsse Geschicht is keen Billerbookgeschicht. Man se vertellt masse över de, de dat in't Leven nich so licht hebbt as de annern – un ik glööv, wenn du den lütten Katteker verstahn hest, denn versteihst du ok de annern Lüüd, de ehr Leven mitünner en beten verdreiht lopen deit. (Heiko Frese) Regina Groot Bramel, de Autorin, is Sozialpädagogin un Riedtherapeutin. Se is Moder vun veer vullwussen Kinner un Pleegmoder vun fiev Kinner twüschen veer un veerteihn Johr. ca. 30 x 23 cm Fast inbunnen. ISBN 978-3-943084-29-0 Ibbenbühren: Klaus Münstermann Verlag 2014, 37 S.
