De Romaan beschrifft, woans twee Schultensöhns, Franz un Natz, up twee Naverhööf opwassen doot.
En Liäseproov:
Aowends sagg Libeth: "Hiärm, hier nao de Schole kümp de Junge nich wier hen, he mott nao de Stadt nao de latinske Schole."
"Ja du, Libeth, bis nich rächt richtig? 'n Bur un Latin?"
"Ick sin richtig genog, wenn du 't män biätter wäörs! Ick segge di, he mott daor hen. Wenn wi 'ne hier wier hen schicket, piltert un schläött de gruowe Kärl 'ne rätts te Schann, dat moß doch togiewen. Schulte Weskamps Kardel geiht der nu auk hen, de sall to Eenjäöhrig studeeren, un wat de küennt, dat geiht bi uß doch auk"
"Küer, küer, dat is dumm Tüg, latinske Buren sind nicks wät."
"Dao heß du ja rächt an, aower wi häöert bi de Schulten, un dat doht de vandage alle. Wi sind dat uesen Stand schüllig. Un dan kik di äß Schulte Breuning aoff Schulte Tollmann an, de häbt beide to Eenjäöhrig studeert, sind dat kiene düftigen Buren?"
[...]
Jeden Muon ret Natz up 'n Iesel nao de Stadt. Väör de Paote, bi Bäcker Husman, kann de Lankaohr in 'n Stall, daor kreg Natz auk sin Middagiätten. Buotterbreide nam he van Hus mit.
Fäör de Bolßenbiecker Schole harr Natz in Huse nich läern bruket, aower nu gönk dat anners. Van fiewe bes siewen soll he sitten un läern. He namm dat aower nich so genau, "van de Professers süht mi nich eene", sagg he. Nao 't Aowendiätten häörde Giäd em de Lektion aff. "Rosa, rosae, rosae, rosam, rosa, rosaa," ...
"Natz, geihst mit in Silva? Ick wet 'n Aquilanest."
"Jau faots. Wao sitt 't denn?"
"Waochten!"
"Unner 'n Drübbelken hauge Böken möken se Haolt, in de höchste satt ganz buowen 'n graut Nest, 'n Öllink fluog draff.
"Dät is jä gar kin Adler, dat is jä mäm 'n Öllink."
Julius Abeler, mit richtigen Naam Julius Heinrich Brinkmann (* 7. November 1859 in Iälte, hdt. Elte, bi Rene, hdt. Rheine; † 3. Juni 1943 in Aulen, hdt. Ahlen) was en plattdüütschen Schriever un Mundoortforscher, de in de mönsterlänske Mundoort van Aulen schreev. (Wikipedia/Plattschapp)
ISBN 3-87716-742-X
Warendorf: Schnell Verlag 2005, 304 S.
