48 literarische Texten sünd in düt Book to finnen ünner de Kapitelöverschriften „Twüschen Elv un Weser“, „Ut uns Tied“, „Wat to’n Högen“, „En Reis dör‘t Johr“, „Hörspeelgeschichten“ un „Regionallyrik“. De plattdüütwschen Texten sünd to'n gröten Deel vergnööglich, man mitünner ok wat irnsthaftig un to'n Nadinken. Wat de Themen angeiht: Dat geiht vun de Kulturgeschicht vun't Elv-Werser-Dreeeck un vun Noorddüütschland bet in Themen vun unse Tiet.
De bekante plattdüütsche Autor Bolko Bullerdiek schrifft dorto: "Dat Book lohnt dat Lesen. Veel Geschichten gaht di na, to'n Bispill "Computer Spelen", wo sik halvwussen Kinner mit'n Computer de Tied verdrievt un beid "goot" seggt, wenn de Öllern avends fraagt, wo jem dat geiht, oder: "Ik heff Kuddel sehn", wo een na dörtig Johr noch an den Fründ denkt, de sick mit'n Motorrad dootföhrt hett, oder "Forikolo", wat den Leser wiet weg in en annern Kontinent bringt. [...] Den gröttsten Indruck hebbt bi mi de Geschichten maakt, de he vörher al as Höörspele gestaltet har. Dat sünd allerdings ok swore Themen. Dor geiht dat üm Euthanasie, üm dat Mitenanner von de Dörpslüüd mit russische Gefangene in'n Krieg un dorna, üm Magersucht oder üm Angst un Gewalt mank Schölers. Man dat sünd nich blots de Themen, den den Leser beröhrt; dat is de sensible oort von den Schriever, de düsse Geschichten en Intensität gifft un den Leser packt" (Quickborn 108 / 2018, S. 46).
Hans-Hinrich Kahrs is Schoolmester an dat Gymnasium Warstaa in Hemmoor, Berader för de Region un ehr Spraken bi dat Neddersassische Landesschoolamt, Autor vun een vun de gröttsten Ortschroniken, de dat geven deit, un vun plattdüütsche Theaterstücken för grote un för lütte Lüüd.
ISBN 978-3-931879-69-3
Staad: Landschapsverband vun de ehemaligen Hertogdömer Bremen un Veern un vun dat Land Hadeln 2017, masse Sieden
