RAINER PRÜSS hett 'n niet Book maakt: DE LEEVDE
weder mal mit Riemels, in gries, swatt, witt un root illustreert, un sogor 'n poor Le´eders sünd dor noch bi.
VUN LEEVDE, SEX UN ANNER SAKEN, DOR KANN MAN SIK EN RIEMEL MAKEN. Un ‘n Riemel maakt he sik over dat ganze. Woans man sik neeger kummt, wie't to Enn geit un allens, wat dortwischen liggt.
Wie seggt Rainer Prüß:
„Mien Föhlen un Denken speelt in düsse Tiet mit all dat Internet, Home-Office, face- un hetzbook un so wieder. Aver bi dat ganze moderne „liken“ gifft dat je jümmers noch de Leevde in all ehre Variantens. Mit un ohne Heirat, mit un ohne Kark, mit un ohne Hauerie un Rosenkrieg un all den Quark, mit un ohne Patchwork, bit hen na de sogenannte Polyamorie. Wat mi in de plattdütsche Schrieverie je opfallt is, dat gifft en Barg Riemels or Gedichtens över Leevde, richtig schöne Saken, aver meist nix över Sex, un dat höört je doch ok woll dorto, jedenfalls in‘t Föhlen, Denken un Doon. All doot se dat, sonst geev dat je doch keen Gören, un de meisten hebb je woll ok masse Spaaß, aver as ik segg, in de plattdütsche Literatur gifft dat meest nix. Is Sex to platt för dat Platt? In Hooch gifft dat je genoog un sülvst Goethe hett ‘n Barg Sex-Riemels maakt. Höllt in dat platte Land vun ole Tieden noch jümmers de Kark de Hann över dat Thema un is de Lüüd dat to jeneerlich wegen Sünde un so? Dat heet je ok, wat Spaaß maken deit is för de protestantische Seel eh al verdächtig.
So kann dat ween, wat de een or anner den een or anner Vers politisch or moralisch ni korrekt finnen deit, nu denn – denn is dat so. Keen dat nich gefallt, bruuk dat je ni lesen oder kann dat Book ok wegsmieten or verschenken. Beschwerde hett bi mi jedenfalls keen Zweck. Mien Fruenslüüd hebb dat allens leest, sik höögt un nix to meckern hatt. Wat mi doch freit, denn keener hett de Wohrheit pacht, awer jedeen hett dat Recht op sien Menen.
Ik heff versöcht, vele Aspekte vun de Leevde afftobilden, wat ik sülvens beleeft heff, aver ok dat, wat ik um mi rum sehn un föhlt heff. Dat allens kann man as Schriever höger or deper leggen, verdünnen oder verdichten, bunte Mischung, ganz na Lust un Laune, man allens na dat Motto: De Leevd vun Anfang bit to Enn ohne dor wat uttoblenn."
Fast inbunnen, Fadenheftung.
ISBN 978-3-00-059444-1
Flensborg: Rainer Prüss Wirtschafts- und Kulturkonzepte 2018, 120 S.
