Wunnerbare Poesie vun Christina Sufka ut Lütten Ils (Klein Ilsede) hett DE KENNUNG in ehr Biheft 11 rutgeven. Eegentlich harr düt Wark een smuckern Inband verdeent, man düsse minne Verpackung passt to de Aart vun Sufka ehr Lyrik: Keen grote un liekers gewaltige Wöör. Vull vun föhlen un verstahn, vertellen un verswiegen, finnen un söken. Op den Padd vun Glooven un Spreken finnt Sufka de Wöör, de verklaart, wat Tied, wat Leven, wat anner Minschen, wat Religion bedüüd. Mitünner ok blots een lütten Gedanken, de di in de Höögt driggt un denn batz twüschen Heven un Eer hangen lett. Züh, un dor hangst du nu, twüschen de Sieden vun düt Heft, un markst: Hier kunnst di inrichten, hier gefallt di dat, hier maakt di nüms wat vör. Een scharpen Blick nah binnen un een open Oog nah baven, vörwarts nah een Leven as He dat meent hett. Opdeelt is dat Heft in acht Deele: Lengen nah Licht; Fragen; Wuurt; Besinnen; Tweig an’n Buum; Heimat; Güe Nacht; Wassen. De mehrsten Texten sünd (Prosa-)Poesie; in den letzten Deel „Wassen“ sünd schiere Prosatexten to finnen: Een Daagebook vun een öllere Froo, de schwanger wurrn is, twee Y2K-Texten op platt un een Hörspeel. De Illustratschoonen (s/w-Fotos) vun Oswald Sufka geevt faaken noch een tweeten Togang to dat, wat de Text vertellt, ünnerstriekt em oder stellt nee'e Fraagen. Biographische Notizen un Publikatschoonsverteeknis helpt de Neeschierigen wieder, de „Worterklärungen“ helpt di, wenn du mit oostfäälsch Platt noch nich so flink togang kummst. Datt du di dor mehr ünner vörstellen kannst, hier een Gedicht to’n Appetit maken (ut dat Deel „Lengen nah Licht“): DEIP Deip is’t wenn ik von buben nah unnen keike Wu deip? Ik kann’t nich seihen Dat Licht schafft et nich bet unnen hen Un de Wärme? Ik kann’t nich feuhlen Wu kuult Mag’t da unnen ween? Mik früst ------ Huch is’t wenn ik vun unnen nah buben keike Wu huch? Ik weit et nich Licht - - - Ik seihe dat de Duisternis heller ward Wärme - - - Ik feuhle dat et nich miehr sä kuult is Wu’t ganz hell un warm is da well ik hen Broschur. De Kennung, Biheft 11 (2004), 115 S.
