14 Gedicht-Zyklen vun "Doc Briese" ut de letzten 8 Johren, dor mang ok de Text "Kanker", de mit den Anerkennungspries vun de Freudenthal-Gesellschaft bepriest worn is.
Carl-Heinz Dirks seggt to düt Wark: „Tüsken Saat un Seise“ - so de Titel van en Book mit Gedichten, schreven van Wilhelmine Siefkes. Gedichten van de Anbegünn bit to ‘t Enn, so de Dag, so dat Jahr, so dat Leven. Dat kwamm mi so tomaal so anflegen, as ik de Zyklen in dit neje Book van Hans-Hermann Briese all mitnanner vör Ogen kreeg. De Oogst van en rieke Leven, van en lebennige Kopp, van over veertig Jahr Schrieven up Platt. Texten för Dagbladen, Kalenners, Jahrboken, Wettstrieden,
Anthologien, ‘n heel Riege egen Boken. Un over 25 Jahr höörde he to de Rutgeverklottje
van Diesel, dat oostfreeske Bladd up Platt, un was daar so ‘n Aard Huusschriever.
Man an eerste Stee stahn Hans-Hermann Briese sien Gedichten - ‘n ansehnelk Antahl daarvan is vertoont. De „Steernenkinner“ komen mi daar as eerste in de Sinn, schreven na en Besöök in de Gedenkstee för vermoorde Kinner Yad Vashem, vertoont van Gerd Brandt. För ehrder klassike Musik hett de Groninger Komponist Christiaan Verhoog (nu Esens) Gedichten van H.H. Briese bruukt, un ok dat Jazz-Ensemble van Klaus Spencker kwamm neet an Briese-Texten vörbi.
Bi Wilhelmine Siefkes sehn wi al an de Förm van de Gedichten, dat se uplest in Eenklang is mit de Welt - ok wenn so vööl verkehrt löppt.
Briese sien Gedichten, meesttieds sünner Riem, gahn faak ‘n heel Stück deper … he is van Huus Chirurg.
En lütte Leesproov:
Gröön
Hier hett dat Gröön dat Seggen.
Gröön Kloren doon sük leggen
Um Loog un sülvern Band,
Gröön Allmende in dat Land.
Of is daar mehr as blot en Loog,
En Stadt in de blau-sülvern Boog,
En Boog van dat sük slingelnd Natt,
Dör gröne Meden dat Stroombedd?
Man hier un daar en Funkje Rood
In dat meest gröne Meedland-Kleed.
So deit dat minskenlose Leven
En Spoor van Minskenwarken geven.
21 x 15 cm, flexibel inbunnen
ISBN 978-3-934835-42-9
Emmen: Diesel Verlag 2020
