Mehr as 200 Karkenleder versammelt düt Lederbook. Dor sünd welk bi ut dat evangeelsche un welk ut dat kathoolsche Lederbook, tohoopstellt na de wichtigsten Gelegenheiten. Dat geiht dör dat Karkenjohr mit Wiehnachten, Oostern, Pingsten, dör den Gottesdeenst mit Avendmahl, Kinddööp un Hochtiet, mit Leder ut de Bibel, Gloven, Leevde, Hopen un Wat een anners noch geern singen mag.
Paul Baumann hett för de plattdüütschen Texten sorgt, Gerd Endemann hett de Noten dorto sett. Dat allens is en grote Leistung.
Dat klore Schriftbild sorgt dorför, dat dat Book goot för den Gottesdeenst döggt. Man ok för dat stille Lesen un Andacht-Holen is dat passlich. An’t Enn steiht en lütt Wöörbook för all de, de nich allens glieks bi’t eerste Lesen begriept.
Greven: Paul Baumann Sübstverlag, 2020, 324 S.
