Wolfgang Müns, de lange Johren de Plattdüütsche Bibliothek in Hamborg leit hett, hett en Sammlung vun besünnere plattdüütsche Texten ut ganz Norddüütschland ut dree Johrhunnerten to'n Advent tohopenstellt, dor mang de Eerstutgaav vun dat Gedicht "Lütt Hein bie Hagenbeck an de Eck", wat anfangen deit mit de Wöör "Bie Hagenbeck an de Eck, dor steiht de Wiehnachtsmann".
Dat "Plattdüütsch Advents-Book", 2021 un 2022 rutkamen in twee Bännen, schull al 1989 bi den Hinstorff-Verlag rutkamen, man denn keem de Wenn un de Lüüd in de DDR weren scharp op allens, wat ut'n Westen keem - den Verlag düch, datt sik dat Book nich verköpen wöör un so kummt dat eerst nu, mehr as 30 Johr later, vörtüüg.
De Anhang wiest nich blots na, wo de Texten vörher rutkamen sünd, man ok Achtergrünnen över de Autoren un Woortverklorens.
DIN A 4, Klammerheftung
Sübstverlag Wolfgang Müns, 2. Oplaag 2022, 76 S.
