Tiewietied (TV-Tied) et kliätert, schrebbelt de Membran et quäbbelt Beller üewerall ut jiäde Lock, ut jiäden Glapp den dicken söten Brie eejn, tweej, dreej un du büst frie Wat för Knööv Wöör hebbt, warrst du bi Bühren sien westfäölske Gedichten gewohr. Kieken deit he wiet över'n Töllerrand, man he speet dor ok rin: Twüschen Landskoppen in Westfaolen un USA, Biller över Minschen un Minschenwark, Erinnerungsverlust un Sinn un Unsinn vun Spraak un Welt springt de Texten hen un her. Starke Metaphern, mitünner överdüdelk, wesselt sick af mit Indrücke, de stahn un hangen blievt, de du opnimmst oder wo du di mit afmarachen deist. De Spraak sprütt man so vör Wöör, de, halv vergeten, an't Licht springt un sick driest blangen Wöör ut Physik, Ingelsch ut anner "unplatte" Rebeten kaamt. Lyrik för kort vör't Dördreihn! Dormang Instrumentalmusik (Klavier, Fiedel un Cello) vun Markus un Frieder Berthold - jüst so experimentell as de Gedichten. Bühren is 1955 in Mettingen/Westfalen born. He hett den Rottendorf-Preis kregen un Lyrik ut Westfalen ut de Heimateck ruttrocken (gifft ok een Sammelband, vun em rutgeven, bi Plattschapp). CD mit een Textheft vun 96 S mit all de Texten. ISBN 3-87023-178-5 Münster: Ardey Verlag, Höredition Nyland o.J., 39 Min. Speeltiet
